Bienvenue sur ma Cha9a9a en ligne "الشتاء جاء و صغيراتنا محتاجين الدفاء"
عسلامتكم يا جماعة ✌️❤️
كيما تشوفوا الطّقْس تِقْلِبْ قلبة خايبة وبدات المطر والريح الباردة تصدم علينا..
وكيما تعرفوا مش الوالدين الكُلْ يقدروا أنهم يوفروا حوايج قادرين يحققوا الحد الأدنى من الدفاء لصغيراتهم .. تلقى البُو والأم يكلتوا نهار كامل، ..
الوضع الصحي والاقتصادي يؤثر بطريقة كبيرة برشا عالعايلات، هذاكا علاش تلقاهم كيف البوكسور الي من أول الطّرح وهو يفارع في وحش قدامو، فارق القوّة كبير برشا،
يقوم من بونية الكراء تجيه بونية فاتورة الضو، يتكوخر بديون العطّار،
وسامحوني كان طوّلت في التوصيف، اما حاولت نوصل قدر المستطاع رُزْنْ الهموم عليهم، والeffets الي يصيروا كي واحد يرتاح منهم..
من أهم الحاجات الي تقلق العايلات التاعبة هي "الكِسْوة"، هي ال apparence متع صغيرهم ، خاصة في طقس كيما هذا !
هذاكا علاش أحنا خمّمنا في النقطة هذي، وبعد ما خدمنا على دبش المكتب، اخترنا انو نخدموا على حوايج الشتاء، خاتر أحنا معاونتنا تتمحور حول القراية، كيما الوالدين احنا زادة خاتر "حتى هوما ولادنا" ، نحبوا نساهموا في ال investissement هذا متع القراية !
اخترنا "المدرسة الإبتدائية بالشرشارة" في ولاية زغوان ، بحكم هي مدرسة في منطقة تاعبة شوية، وما فيهاش برشا تلامذة، نحكيوا هوني على 64 تلميذ اكهو، والحقيقة استمرارهم في القراية وخاصة حبهم ليها، مرتبط بينا احنا لو قدرنا نوفرولهم حوايج شتاء يتدفاوا بيهم ويعديوا بيهم الفترة هذي الكل ويقعدولهم لعام وعامين علاش لا.
اخترنا انو كل تلميذ يفرح بحاجة جديدة مقرطسة من باكوها ويكون من نصيبو صندوق فيه :
- كبّوط 🧥
- مريول صوف وسروال ( ولا jogging و capuche) 👖👕
- زوز كلاسط خشان 🧦
- كشكول و bonnet 🧣
- صبّاط
الصغير يتكلف تقريبا في ال150د !
وبالطبيعة كل صندوق فيه شوية قصص وشوية حلوى ولعبة ❤️
نستحقوا دعمكم بالطرق الكل، ماديا معنويا بالبرتاج وبالرياكت وبكل شي، ويرحم والديكم الكل ❤️
( الي يحب يتكفل بصغير ويشريلو هو الدبش يكلمني عالخاص نعطيه الtaille وال pointure ❤️ )
#حوايج_الشتاء
